Тус нэгэн сэдэвт бүтээл нь умард Монголын нутаг дэвсгэрийг судалсан олон
жилийн судалгааны үр дүнгээр бичигдсэн юм.
Умард Монголын ургамлын аймаг бүтээл нь тухайн бүс нутагт хийгдсэн анхны
том бүтээл гэж хэлж болно. Учир нь өндөр уулын, уулын ойн, уулын хээрийн
бүслүүрийн ургамлын аймаг, хийгээд бүслүүр тус бүрийн ургамлын аймгийн бүртгэл
бичгийг гаргаснаас гадна таксаном, экологи, газарзүйн амьдралын хэлбэрийн
анализ хийсэн байдаг.
Умард Монголын хэмжээнд 95 овгийн 490 төрөлд хамаарагдах 1885 зүйл
ургамалтайг тогтоосноос уулын хээрийн бүслүүрт 69 овгийн 314 төрлийн 855 зүйл, уулын ойн бүслүүрт 74 овгийн 293
төрлийн 817 зүйл, өндөр уулын бүслүүрт 49 овгийн 171 төрлийн 455 зүйл
ургамалтайг тогтоожээ. Мөн энэхүү судалгааны үр дүнд Монголын ургамлын аймагт
126 зүйл ургамлыг шинээр нэмэн бүртгэсэн.
Тухайн бүтээлийн онолын шинэ санаа
бол Умард Монголын ургамлын аймаг, түүний гарал үүслийн түүхэн хөгжлийн явц
нь хил зэргэлдээхь ургамлын аймаг,
ялангуяа зүүн талаасаа Дорнод Азийн, хойд талаасаа өмнөд Сибирийн, баруун
талаасаа Газар Дундын Тэнгисийн өмнөд талаасаа Төв Азийн ургамлын аймаг салшгүй холбоотой гэдгийг тогтоосон.
Уг бүтээл нь ургамал судлаач бүх
хүмүүс болон их, дээд сургуулийн багш, оюутан сурагч, байгал хамгаалагч зэрэг
бүх хүмүүст гарын авлага болно.
