Судалгааны гол үр дүнгүүд

Тус лаборатори нь сүүлийн жилүүдэд TP53, CTNNB1, AXIN, JAK1, KRAS зэрэг генүүдийн мутацийг хүний эдийн дээжинд илрүүлж эдгээр мутаци нь элэгний хорт хавдрын үед эсэд өндөр давтамжтай илэрдэг болохыг тогтоосон.
Элэгний хавдрын маркер уургийн өөрчлөлтөд тулгуурлан элэгний хавдрыг эрт илрүүлэх оношлуурын цомог болон шинэ төрлийн коронавирус SARS-CoV-2-ийн халдварыг илрүүлэх оношлуурын цомог гарган авсан.
Элэгний хавдрын in vitro шугаман эсүүдэд Эмийн багваахай (Taraxacum mongolicum), Шарилж (Artemisia xerophytica Krasch, A.lavandulaefolia), Байгал гүүн хөх (Scutellaria baicalensis), Их шүүдэргэнэ (Chelidonium majus L) зэрэг 12 зүйл ургамлаас гаралтай ханд, бодис, бэлдмэлийг үйлчилж хавдрын үед ихээр идэвхждэг зарим маркер генүүд (ZFYVE1, GPC3, SH3BGR, GPR175, h-Ras, Fak, Bcl-2) болон хавдар дарангуйлагч генүүдийн (TNF-α, TP53, CASP) экспресст хэрхэн нөлөөлж буй талаар судалгаа хийж тэдгээрийн өөрчлөлтийг тодорхойлсон.
HBV, HCV-ийн халдварыг илрүүлэх молекул генетикийн орчин үеийн арга болох ПГУ (Полимеразын гинжин урвал) ашиглан оношлох арга зүйг боловсруулан шинжилгээ, судлагаанд нэвтрүүлэн 2000 гаруй хүнд дээрх вирусуудын геном, идэвхжлийг илрүүлснээс гадна ПГУ аргыг ашиглах 2 патентийн эрх авсан.
Элэгний хавдар үүсэхэд хепатитийн дан болон давхар халдвар ихээхэн нөлөөтэй (92%) болохыг илрүүлсэн нь манай хүн амын дунд ихсэж буй элэгний хавдрын шалтгааныг тогтооход ихээхэн ач холбогдолтой болсон.
HCV-ийн 1b, HBV-ийн D, HDV-ийн 1 генотип буюу генетик тогтоц манай хүн амын дунд зонхилон тархсаныг тодорхойлсон.

· Xэрэгцээт биобүтээгдэхүүн гарган авах, сайжруулах, хэрэглээнд нэвтрүүлэх чиглэлээр “Шинэ төрлийн коронавирус SARS-CoV-2-ийн халдварыг илрүүлэх фермент холбоот эсрэгбиеийн урвалын (ЭЛИЗА) оношлуурын цомог боловсруулах” инновацийн төсөлт ажлыг хийж гүйцэтгэсэн. Тус ажлын хүрээнд бид халдварын улмаас шинэ төрлийн коронавирусийн эсрэг эсрэгбие үүссэн эсэхийг тодорхойлох оношлуурыг амжилттай гарган авч 2000 гаруй дээжид уг вирусийн эсрэгбие илрүүлэх шинжилгээг хийж гүйцэтгэв.